తీపి విషం

విరిగిపడ్డ స్వర్గ శకలం నుండి

నవ్వుతూ రమ్మని పిలిచింది

చేయందించింది, లాగింది

నాది కాని ఏదో లోకంలోకి.

మునివేళ్ళతో పెదవులను ముద్దాడి

మధువు నాపై చిమ్మినట్లుంది

మ్మ్మ్...మత్తు ! తెలుసా,

మరెవ్వరి పిలుపూ వినిపించనంత

మరింకెవ్వరి చూపూ సోకనంత

బద్దలవుతోందే హృదయం,

ఆ గొడవేమిటో వినపడనంత!

మదిరపాత్ర ఎప్పుడు చిట్లిందో

ముత్యాలెలా తివాచీపై దొర్లాయో

బ్రతుకు స్పర్శ చూపిన రాతిరిని

మళ్ళీ ఏ చీకటి మింగేసిందో

ఇంకా గుచ్చుకుంటోన్న

కలల  గాజు పెంకులూ

ఇంకా నెత్తురోడుతోన్న

జ్ఞాపకపు తునకలూ

చెప్పవెందుకని?

సాకీ,

నువ్వైనా?